Арсенал. Ижевскысь Кремль.К. Герд нимо Йӧскалык музей


Ижкарысь пыӵал поттонъя заводлэн Арсеналэз – XIX даурысь ӟуч классицизмлэн архитектурая синпелетэз. С.Е. Дудин архитектор сое лэсьтыны кутскиз 1823-тӥ арын, нош быдэстэмын со вал 1827-тӥ аре. Александр I, кудӥз Ижкаре вуылӥз но Арсеналэ ветлӥз, С.Е. Дудинлэсь ужзэ 4-тӥ степенё Владимирлэн орденэныз пусйиз.

Архитектор Арсеналэз каргуртлэсь вуоно дыре будэмзэ лыдэ басьтыса проектировать кариз. Азьланяз юрт кар пушкы пыроз шуыса, С.Е. Дудин сое лэсьтон вылысь тужгес но ӝужыт интыысь паськыт бусыез бырйиз.

Юртлэн куинь фасадъёсыз ӟуч классицизмлы тупатскыса лэсьтэмын, соослэн туссы ӵапак одӥг кадь: шоразы – куать колоннаен но куинь сэрегъем фронтонъёсын портикъёс; урдэс ласянь – ӧжытак мычиськыса улӥсь ризалит-бурдъёс. Юртлэн тусыз П-лы кельше, со лымшор пала учке, соин ик нунал ӵоже татын туж югыт. Азбарлэн шораз – пыӵалэз бичанъя но сузянъя инты; татчы ик заводлэн школаез интыяськиз, кытын нылпиосыз пичиысен ик пыӵал бичаны но солэсь ӟечлыксэ эскерыны дышетӥзы. Та корпусысь валтӥсяз корпусэ галереяос нуизы, кудъёсыз чакламын вал пыӵал-тӥрлыкез зор-кот дыръя кӧсын выжтон понна. Арсеналлэн огъя быдӟалаез 3000 кв.м.

Арсеналлэн юртаз Ижкарысь рабочийёсын лэсьтэм пыӵал-тӥрлыкез трос дасо аръёс ӵоже утьылӥзы, собере, ящикъёсы тырыса, ожчиослы ыстылӥзы. Ӝыны даур ӵоже Арсенал утиз но солдатъёслы вуттӥз трос сю сюрс пыӵалъёс но пистолетъёс, озьы ик трос «кезьыт» оружие. Одӥгез висъет огдыре аспӧртэмлыко музей вал: татчы бичазы заводын потӥсь вань пыӵалъёслэсь образецъёссэс, соослэсь люкетъёссэс, корт но андан дасетъёсты (заготовкаосты), инструментъёсты, заводысь механизмъёслэсь модельёссэс.

Нырысетӥ Дунне ожгар мыныку, ужпӧрез паськытатэмен валче, Арсеналлэн лымшор палаз 2 этажъем юртъер лэсьтэмын вал, отчы ложевой мастерской интыяськиз. Али дыре, юртэз тупатъям бере, татын Удмурт Элькунлэн Азьмуртэзлэн резиденциез интыяське.

1970-тӥ аре Арсеналлэсь пичи люкетсэ краеведческой музейлэсь экспозициоссэ интыян понна тупатъязы вал ини. 1986-тӥ аре тулыс Арсеналлэн юртэз быдэсыз со понна висъямын вал. 2000-тӥ арын Музейлы тодмо удмурт кылбурчилэн но мерлыко ужасьлэн Кузебай Гердлэн нимыз сётэмын. 1975-тӥ арысен азьвыл Арсеналлэн юртэз федерал нимлыко синпелет луэ.

Страна:

Россия
Город:
Ижкар
Адрес:
Коммунаров урам, 287
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна