Ӵыпет


1760-тӥ арын оштолэзе А.С. Москвин горной инженерлэн кивалтэмез улсын Оӵ шур вылын, Ягул шурен огинэ вуон интыезлы кыдёкын ик ӧвӧл, П.И. Шувалов графлэн дэмламезъя ӵыпет ӝутыны кутскизы – корт дуронъя заводэз лэсьтон вылысь. 1763-тӥ арын инвожое уж йылпумъямын вал, ву люкаськиз, соку ларьёслэн пыкетъёссы нырысьсэ ӝутэмын вал.

Иж ӵыпет ӵукшор паласен ӝытшор пала кыстӥськиз, ӵапак со Ижкарлэсь кудпала лэсьтӥськонзэ радъяз-тодмостӥз. Та осья ик архитектурая валтӥсь ансамбльёс но радъяськизы.

Нырысь-валысь Ижкар тыметлэн ӵыпетэз кузьдалаезъя 267 сажем (570 м) но пасьталаезъя 13 сажем (27,7) вал. Со тырмыт вал вуэз со кемозь ӝутыны, кӧня кулэ вал завод механизмъёсты ужатон понна.
Ӵыпет «кыкетӥзэ вордскиз», куке 1807-тӥ аре корт дуронъя ужпӧрлэн инъетэз вылын Пыӵал завод кылдӥз. Со учыре ӵыпетэз пырак воштыны кулэлык кылдӥз, озьы ик вулэсь быдӟалыксэ будэтоно но быдэс гидроэнергетической возёсэз выльдоно вал.

1815-тӥ арын воштонъя-выльдонъя нырысетӥосыз бадӟымесь ужъёс кутскизы. Отчы кыскизы тужгес умойёссэ кужымъёсты – соос пӧлын вал синмаськымон архитектор, А.Д. Захаровлэн дышетскисез но юрттӥсез – С.Е. Дудин. Дудин лыдъяз-ӵотаз, кӧня коньдон кулэ, ӵыпетэз паськытатон но ӝутон, озьы ик ярдуръёсты юнматон понна. Огъя лыдпус туж бадӟым потӥз, соин ик ужъёс коньдон кылдэмъя нуиськизы. Дудинлэн ӵектосэзъя ужъёс 1816–1818-тӥ аръёсы мынӥзы, быдэсак 1824-тӥ арын йылпумъяськизы.

1835-тӥ арын ӵыпетлэн ветлоно интыяз водостокъёс но излэсь шоссе лэсьтӥзы, пыдын ветлӥсьёс понна – из тротуар. Ӵыпетэ будос мерттон кема дыр ӵоже чакламын ӧй вал. XIX даурлэн пумаз гинэ татчы егит топольёс мерттӥзы, соос пумен салкымо аллеялы пӧрмизы.

Дыр ортчемъя ӵыпет ужпӧр кулэлыксэ ыштӥз. Вуж техника интые электродвигательёс вуизы. Ӵыпет технической вуэз вуттыны гинэ кулэ луиз на. 1954–1957-тӥ но 1963–1966-тӥ аръёсы гужем толэзьёсы ву кисьтӥськон интыос (водосливъёс) выльдэмын вал. Пу лотокъёсты железобетонэн воштӥзы, нош «ву сием» интыосы векчи из кисьтӥзы. 1983–1984-тӥ аръёсы ӵыпетлэн «мугорыз» кык поллы паськытатэмын вал. 1984-тӥ арын сюй ӝутон йылпумъяськиз, нош интыез чеберматон али но азинтӥське.

Страна:

Россия
Город:
Ижкар
Адрес:
проезд Дерябина
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна