Ижкарысь но Удмуртиысь епархилэн Свято-Александро-Невской Кафедрал соборез


Александро-Невской собор – историлэн но вылӥ ӟуч классицизм архитектуралэн синпелетэз. Выль Соборлы образец луиз Кронштадтысь Андреевской собор, кудӥз 1817-тӥ аре А.Д. Захаровлэн ӵектосэзъя лэсьтэмын но революци бере куашкатэмын вал.

Собор ас пушказ быдэс ӟуч классицизмез пыӵатӥз – со выллем ик кунэрес, кунлыкез данъясь, Петербург кадь кезьыталэс. Планэзъя квадратлы укшась, быдӟалыкезъя – кублы, кезьыт храм барабан вылын возиськись сфераё липетэн пытсамын. Вандэм сэрего ньыль кужмо пилонъёс распорез сайяло. Ӝытшор-ӵукшор черсъя (осья) кыллись кык аркаос алтарь но валтӥсь неф шоры учко, нош лымшор но уйшор паласен соос ниша кадь адско.

Али дыре Собор выльысь академи стилен суредамын. Татын йӧтскыны луэ Сӥё-дано Голгофаысь Излэн люкетъёсыз борды но Кирослэн Пулэз борды, преподобной Афанасий Афонскийлэн, Лаврентий Печерскийлэн, Лука Печерскийлэн, Илия Муромскийлэн, Лонгин Афонскийлэн, Феодор Печерскийлэн, святитель Иоанн Тобольскийлэн, благоверной Быдӟым князь А. Невскийлэн, преподобной Ефимий Великийлэн, Серафим Саровскийлэн, Павел Афонскийлэн, Меркурий Печерскийлэн люкетъёссы борды.

Тодмо архитекторлэсь ӵектоссэ йылаз-пумаз вуттыса, С.Е. Дудин храмез Ижкарысь огъетэ-ансамбле пыртыны усто быгатӥз. 1929-тӥ аре Собор Инмарлы оскисьтэм егит пиослэн косэмзыя ворсамын вал. Со аре ик гырлы жугонни куашкатэмын, нош ачиз Собор клуб луиз.

1930-тӥ арысен Собор нылпиослы клуб но кинотеатр вал, бергес – Инмарлы осконтэмлыклэн музеез. 1932-тӥ аре, юртэз выльысь тупатъям бере, азьвыл соборын «Колосс» кинотеатр усьтӥськиз. 1937-тӥ аре храмлэн котырес липетэз басьтэмын вал.

Оскисьёслы Соборез 1990-тӥ арын берыктӥзы; 1992-тӥ аре, тупатъянъя-воштонъя ӵектосэз дасям бере, черкез ӝутонъя ужъёс кутскизы. 1993-тӥ арлэн пумаз лэсьтон-тупатъян йылпумъяськиз, собор вӧзы выль чукинон храм лэсьтэмын, озьы ик – вуэз чылкытатӥсь иордань но гырлыжугонни. 1994-тӥ арын 2-тӥ толшоре собор освятить каремын вал.

Соборен артэ Ижысь Пыӵал заводэз кылдытӥсь, Ижкарез лэсьтӥсь Андрей Федорович Дерябин оберберггауптманлэн Усыпальницаез («Кӧлон» интыез) ӝутэмын. А.Ф. Дерябинлэн мугорыз Ярославль дорысь Свято-Введенской Толгской монастырьысь Ижкаре ваемын вал. 2005-тӥ аре 10-тӥ инвожое ортчиз А.Ф. Дерябинлэсь мугорзэ выльысь ватон.

Страна:

Россия
Город:
Ижкар
Адрес:
Горького урам, 66
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна