Михайловской колонна


1852-тӥ аре Базарная (бергес – Соборная) падвожын быдӟым князьлы Михаил Павловичлы синпелет пуктэмын вал: со – чугунлэсь колонна, кудӥз вылын кияз киросэн кылчин (ангел) сылэ. Дано юболэн выжыяз-пьедесталаз, огпаласен, «Вунонтэм генерал-фельдцейхмейстерлы тау карись подчиненнойёс» гожтэмын вал, мукет паласен, – улон арзэ пусйись лыдпусъёс.

1849-тӥ аре быдӟым князь Михаил Павлович (Павел I императорлэн ньылетӥез пиез) кулӥз. Сое юн яратӥсь выныз Николай I император мылкыд кариз, та монумент Ижкарын мед сылоз шуыса. Сое усьтонлы ачиз ик дыр пуктӥз – 8-тӥ шуркынмонэ. Синпелет лэсьтыны коньдон сётӥзы пыӵал заводлэн кивалтӥсьёсыз но мастеровойёс. Технической документациез дасязы заводысь архитекторъёс, кудъёсыныз валтӥсь архитектор И.Т. Коковихин кивалтӥз.

Кык ар куспын бадӟым гранит пьедестал вылэ пуктэмын вал 10 сажемъем (20,3 метръем) юбо-колонна, со йылэ интыямын туй ыргонлэсь лэсьтэм 3 метръем ангел, кудӥз кияз 4 метръем кирос возе. Синпелетлэн котькуд люкетэз туж усто чебермамын вал.

Иж заводлэсь Михайловской колонназэ, кытчы интыямын вал Александр I-лэн гожтэмез-вензелез, кортлэсь лэсьтӥзы: пропорциосызъя но чеберман декорезъя со Дворцовой площадьысь Александрийской юболы укша.

1918-тӥ аре синпелет куашкатэмын вал, выльысь ӝутэмын со 2007-тӥ аре гинэ, озьы ке но азьвыл тусэзлы пырак тупатытэк.

Али дыре Михайловской юболэн огъя ӝуждалаез 19 метр. Солэн мугорыз ярусэн-ярусэн лэсьтэмын, котькудӥз куинь 120 градусъем люкетъёслэсь пӧрмемын. 3 метрысен колонна конус выллем паськытаса кошкыны кутске, пасьталаез 1,6 метрысен 1,3 метрлы воштӥське. Одӥг люкетэзлэн секталаез 140 килограммысен 180-озь. Берпуметӥез, дасэтӥез, ярус – быдэслыко. Юболэн-колонналэн кульчолы кельшись инъетэз озьы ик пичи люкетъёслэсь пӧрмемын. Ваньмыз та огъя технологиен юнматэмын: кӧс амалэн, анкеръёс вылын, раствор кутытэк лэсьтыса.

Ангеллы-утисьлы сӥзем синпелетлэн авторез – Павел Медведев.

Страна:

Россия
Город:
Ижкар
Адрес:
Горького урам, 71
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна