"Ижкар оружейникъёс" синпелет


Ижкарысь пыӵал лэсьтӥсьёслы синпелет пуктэмын 2007-тӥ аре, Ижкарысь пыӵаллы 200 ар но Калашниковлэн автоматэзлы 60 ар тырмонэз пусъёнэн валче.

Синпелет ӝутон сярысь малпанзэс веразы ОАО «Ижевский машиностроительный завод»-лэн но ГУП «Ижевский механический завод»-лэн кивалтӥсьёссы. Монумент возьматэ эксэй вакытысь тужгес ӟеч пыӵал лэсьтӥсьёсыз, кудъёсызлы «эксэй» кафтан кузьмамын вал. Солэн авторез луиз Павел Медведев. Синпелет кылдытон понна Павел Медведев кутӥз вуж туспуктэмъёсысь зэмос адямиослэсь, иж заводысь мастеръёслэсь, тусбуйзэс.

Пушсузьетэз (композициез) ласянь ке учконо, монумент возьматэ зарни позументо кафтанэн но цилиндрен дӥсяськем кык адямиосты. Дӥськутсы юнме шорысь быръемын ӧвӧл: эксэй кафтанъёсты юри куремъя вурылӥзы но тужгес ӟеч мастеръёслы сётылӥзы; со вӧзы одно ик трость, цилиндр но чиньыёпӧзь ватсаллязы.

Усточи-скульптор вакытлэсь шӧмзэ патинирование амал пыр шӧдытыны тыршиз. Туй ыргонлэсь лэсьтэм синпелет али ик ӧжытак вужмемын кадь адске.

Гранитлэсь пилонъёс вылын кык даур ӵоже тужгес тодмо луэм адямиослэн нимъёссы пусъемын: М.Т. Калашников, Г.Н. Никонов, В.А. Ярыгин, Е.Ф. Драгунов, И.Ф. Белобородов, В.П. Ионов, Н.И. Палладин. Озьы ик тужгес но тодмо ыбылӥськон пыӵал-тӥрлык поттӥсьёслэн нимзы – Ижкарысь машиналэсьтон но механической заводъёс.

Синпелет Ижысь вань пыӵал лэсьтӥсьёслэсь, огшоры адямиослэсь, кин Россия понна дано пыӵал-тӥрлык поттӥз, ужзэс-вормонзэс возьматэ.

Синпелет сылэ Пыӵал лэсьтӥсьёслэн падвожазы. Али татын пӧртэм данъян ужрадъёс ортчо: награда сётон, егит ужасьёсты оружейникъёс радэ пыртон – ваньмыз со дауръёслэсь но выжыослэсь герӟетсэс возьматэ.

Страна:

Россия
Город:
Ижкар
Адрес:
Площадь оружейников
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна