Удмурт элькунысь Кун йӧскалык театр


Кун йӧскалык театр кылдэмлэсь азьвыл «Горд удмурт» нимо шорлыко удмурт клуб ужаз, со 1923-тӥ арын усьтэмын вал. Татысь драмкружок самодеятельной театрлы сюрес усьтӥз, нош со вылэ инъяськыса, 1931-тӥ аре 7-тӥ тулыспалэ нырысетӥез удысужлыко (профессиональной) удмурт театр кылдӥз. Нырысетӥез спектакль егит удмурт драматурглэн Игнатий Гавриловлэн «Вало ӧр куашетэ» пьесаезъя пуктэмын вал.

1935-тӥ аре театр «кунлыко» инэт (статус) басьтӥз. Репертуараз егит удмурт драматургъёслэн сяна, классикъёслэн но – Н. В. Гогольлэн, К. Гольдонилэн, Ж.-Б. Мольерлэн но мукетъёсызлэн – ужъёссы пыризы.

Быдӟым ожгар кутскемен валче театр пытсаськиз, но 1942-тӥ аре 20-тӥ коньывуонэ сое выльысь усьтыны кыл кутэмын вал. 1951-тӥ арысен татчы театральной дышетсконниосты йылпумъям выль шудӥсьёс вуизы – Мускоысь, Ленинградысь, Уфаысь но М. С. Щепкин нимо Вылӥ театральной училищеысь, кудӥз Покчи Академи театр бордын ужаз. Татын тодмо артистъёс, режиссеръёс, суредасьёс будӥзы. 1996-тӥ арын театр туала нимзэ басьтӥз.

Вань ужатозяз Йӧскалык театр дугдылытэк ӟуч но кунгожсьӧр классикъёслэсь тужгес умой пьесаоссэс пуктэ. Театрлэн репертуараз нимысьтыз инты басьтэ удмурт драматургия, кудӥз калыкмылэсь ассюрессэ (историзэ) возьматэ. Удмуртиысь калык по:лы потам сяна, театр спектакльёсыныз Пермь но Киров улосвылъёсы, Башкортостанэ но Татарстанэ – удмуртъёслэн люкенак улон интыосазы – вуылэ.
2008-тӥ арлы, куке Удмуртилэн ас мылыкыдызъя Россие пыремезлы 450 ар тырмиз, театрлэсь юртсэ выльдон йылпумъяськиз. Юбилей нуналлы Йӧскалык театр дасяз но пуктӥз В. Садовниковлэсь «Сюан» пьесазэ.

Страна:

Россия
Город:
Ижкар
Адрес:
ул.Горького, 73
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна