Ужез яратӥсьёслэн Ольга нимо приютсы


1895-тӥ аре Николай I анай-атайтэк но улон интытэк кылем нылъёслы но пиослы нимысьтыз сэрег кылдытон сярысь указ поттэ, сое ужез яратӥсьёслэн Ольга нимо приютсы шуыса ниманы косэ, Ольга Николаевна княжнаез буре вайыса.

1910-тӥ арлы Россиын 36 Ольгинской приют вал ини. Соос пӧлысь одӥгез – Вятка губерниысь Сарапул уездысь Ижевско-Нагорной волостьысь ужез яратӥсьёслэн Ольга нимо приютсы, кудӥз кылдытэмын вал 1896-тӥ аре 11-тӥ оштолэзе но Ижкарысь нырысетӥез нылпи корка луиз.
Никольской черклэн азьвыл приютэзлэн юртэз 1898-тӥ аре пуктэмын вал, берло со заводын ужасьёслэн нылпиоссылы чаклам «ужез яратӥсьёслэн Ольга нимо приютсы» нимаськиз.

Та приют кылдытэмын вал анай-атайтэк кылем но йыруж лэсьтэм нылпиосты зэмлыкез валась, ужез яратӥсь адями карыса будэтыны вылысь, «кудъёсыз киуж-ӧнерлыкез но возёслэсь кыӵе ке но удыссэ тодысалзы». Нылпиосты татын гожъяськыны дышетӥзы, озьы ик музъем ужлы, ӵемгес – бакча ужлы, но капчигес киуж-ӧнеръёслы.

Приют бордын кенеш кылдытэмын вал, кудзэ волостьлэн кенешез куинь арлы огпол бырйылӥз. Пӧртэм вакытэ кенешлэн тӧроез луизы П. М. Савостьянов но А.А. Певцов – Ижкарысь пыӵал поттонъя но андан лэсьтонъя заводъёслэн кивалтӥсьёссы, Л. Н. Дубницкая – А. Г. Дубницкийлэн кышноез, кудӥз озьы ик та заводъёслэн кивалтӥсьсы вал. Совето вакытэ одӥгез директорез вал Элькунмылэн дано кун но мерлыко ужасез Кузебай Герд.

Ольгалы сӥзем приютлэн юртэз Ижкарын туннэ но сылэ, со сю арлэсь ятыргес ини нылпиос понна ужа. Али отын Первомай ёрослэн нылпи творчествоя Юртэз интыяське.

Страна:

Россия

Город:
Ижкар
Адрес:
Sovetskaya, 22b
Поделиться страницей
09.07.2013
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна