Драмая Ӟуч театр


Драмая Ӟуч театрлэн юртэз (Лулчеберетъя дворецлэн азьвыл «Машиностроитель» юртэз) яркыт возьматэ совето архитектуралэн конструктивизм ӧрезлэсь 1950-тӥ аръёсы азинскемзэ.

Нырысетӥ юрт лэсьтэмын вал Ижкарысь Пыӵал поттонъя заводлэн падвожаз 1928–1930-тӥ аръёсы, ВХУТЕМАС-ын дышетскем З. Н. Мироновалэн ӵектосэзъя. Со чакламын вал Октябрь Революцилэн Клубезлы шуыса. Юртлэн азьпалыз Советской ураме потэ вал, нош ачиз корпус Горький урамлэсь быдэс кварталзэ басьтӥз.
Быдӟым Атыкай Ожгар дыръя клубе одӥгез эвакуировать карем завод интыяськиз.

1946–1950-тӥ аръёсы юртэз В. П. Орлов архитекторлэн ӵектосэзъя выльдӥзы, пумен лэсьтӥськонлэсь валтӥсь туссэ-схемазэ гинэ кельтӥзы. 1950-тӥ аре ӝутэм тужгес ӟечлыко юртъёслэн быдэс Россиысь ӵошатсконазы та лэсьтос кыкетӥ премия басьтӥз. Со дырысен клубез Машиналэсьтӥсьёслэн лулчеберетъя Дворецсы (ДК "Ижмаш") шуыса нимазы.

Пырон ӧс вадескы интыямын вал ужасез но ожгарчиез возьматӥсь скульптура (юртэз 2011-тӥ аре выльдон дыръя со быдтэмын), кудӥзлэн авторез Удмурт АССР-ысь устолыкъя дано ужась М. Х. Тутынин вал.

2007-тӥ аре Удмурт Элькунлэн Кивалтэтэз Лулчеберетъя Дворецез нош ик выльдыны кылкутӥз. Таӵе бадӟым ужез быдэстыны ӵектэмын вал улосвылысь лэсьтӥськонъя тужгес но бадӟым огазеяськонлы «Россилэн Спецстроез бордысь 8-тӥ номеро ГУССТ» ФГУП-лы. Лэсьтӥсьёс висъетъёслэсь пушсэс тупатыны но быгатэмзыя утьыны тыршизы. Валтӥсь фойеын, кытын эктон ӝытъёс ортчылӥзы, паркет выжез но лепнинаез воштӥзы. Вӧлдэтэз туала Ижкарез возьматӥсь суредъёс чебермало, со – Азьмуртлэн резиденциез, Арсенал, Ижмаш башня.

Озьыен, 2011-тӥ арысен, шуркынмонысен, Драмая Ӟуч театрлэн выль юртъерез кылдӥз – со «Ижмаш»-лэн выльдэм дворецез. «Корка туй» – театрлы азинскыны синмаськымон луонлык, нош учкисьёслы – выльысь тунсыкъяськыны муг. Нимысьтыз та учырлы театр ӟуч но кунгож классикаысь драматургияя премьераос дасяз, соос пӧлын Н. В. Гогольлэн «Женитьба», А. Островскийлэн «Вещий сон, или любовь в четверг после обеда», Б. Шоулэн «Пигмалион» пьесаоссы но мукетъёсыз.

Ижкар

Адрес:
Горького урам, 71 
Поделиться страницей
31.10.2018
Информационно-аналитическоe управление Администрации города Ижевска © 1998-2019г.
При любом использовании материалов сайта ссылка (в Интернете - гиперссылка) обязательна